Digjitalizimi nuk është një qëllim në vetvete, por një mjet i fuqishëm për t'u përballur me sfidat më të mëdha shoqërore – lufta kundër korrupsionit, përmirësimi i transparencës, përmirësimi i shëndetësisë, arsimit dhe gjyqësorit, si dhe krijimi i një klime të favorshme afariste.
Me miratimin e Strategjisë për Zhvillimin e TIK-ut: SMART/MK 2030, Qeveria e Republikës së Maqedonisë së Veriut vendos një vizion të qartë për një shtet të zgjuar, digjital, të lidhur dhe inovativ – një shtet që e përdor teknologjinë në shërbim të qytetarëve, institucioneve dhe ekonomisë. Për të vendosur një qasje tërësisht gjithëpërfshirëse, Strategjia bazohet në katër shtylla:
-
Infrastruktura dhe lidhshmëria e TIK-ut – zhvillimi i një infrastrukture digjitale të sigurt, të qasshme dhe të qëndrueshme si bazë për transformimin digjital.
-
Kompetencat digjitale dhe përfshirja – ndërtimi i aftësive digjitale dhe sigurimi i qasjes së barabartë në mundësitë digjitale për të gjithë qytetarët.
-
Qeverisja elektronike dhe shërbimet elektronike – përmirësimi i shërbimeve publike, transparencës dhe besimit në institucione përmes zgjidhjeve digjitale.
-
Bizneset, inovacioni, inteligjenca artificiale dhe teknologjitë e reja – nxitja e ekonomisë digjitale, ekosistemit të start-upeve dhe zbatimi i teknologjive të reja.
Këto prioritete janë plotësisht të harmonizuara me kuadrin evropian të Dekadës Digjitale 2030, dhe zbatimi i tyre do të realizohet përmes një Plani Veprimi me masa konkrete, afate kohore dhe institucione përgjegjëse.
SMART/MK 2030 është një vizion dhe angazhim i përbashkët për të ndërtuar një Maqedoni digjitale, të hapur dhe konkurruese, të gatshme për sfidat dhe mundësitë e shekullit të ri.