Ministri i Transformimit Digjital, Stefan Andonovski, sot prezantoi Strategjinë e re Kombëtare për Teknologjitë e Informacionit dhe Komunikimit – “SMART/MK 2030”, duke i dhënë kështu Maqedonisë, pas tetë vitesh, një plan modern dhe gjithëpërfshirës për zhvillimin digjital.
“Ky dokument përfaqëson një udhërrëfyes për mënyrën se si shteti ynë do të realizojë të ardhmen digjitale – të përputhur me vlerat dhe standardet evropiane për Dekadën Digjitale 2030, por edhe me vizionin dhe nevojat maqedonase,” theksoi ministri Andonovski.
“SMART/MK 2030” është një dokument kombëtar, pjesë e një agjende më të gjerë evropiane për zhvillim digjital. Si vend kandidat, Maqedonia pranon kuadrin e Dekadës Digjitale Evropiane, që parashikon katër qëllime deri në vitin 2030:
- qytetarë të trajnuar digjitalisht dhe ekspertë të kualifikuar TIK,
- infrastrukturë e sigurt dhe e lidhur,
- shërbime publike të digjitalizuara,
- biznese të integruara digjitalisht.
“Strategjia jonë ndjek direkt këto prioritete evropiane. Ajo forcon konvergjencën institucionale me vendet anëtare, krijon mundësi për pjesëmarrje në programet digjitale evropiane dhe siguron qasje në instrumente financiare dhe ndihmë teknike nga Bashkimi Evropian. Me të, bëhemi një pjesë aktive e komunitetit digjital evropian – si një partner që kontribuon me njohuri, zgjidhje dhe inovacione të veta,” shtoi ministri Andonovski.
Kjo strategji është rezultat i një procesi të gjerë dhe gjithëpërfshirës. U mbajtën dhjetëra konsultime publike dhe diskutime online. Në përgatitjen e saj u përfshinë mbi 300 ekspertë, institucione, dhoma tregtare, organizata joqeveritare, universitete dhe përfaqësues të industrisë TIK.
“Çdo rekomandim, çdo masë dhe çdo prioritet burojnë nga konsensusi i përbashkët – si të ndërtojmë një Maqedoni digjitale që bashkon të gjithë sektorët shoqërorë,” përfundoi Andonovski.
Strategjia shoqërohet me një Plan Aksional, i cili e shndërron vizionin në hapa konkretë. Fokus është dhënë në implementim të shpejtë, tregues të qartë dhe vlerësim të vazhdueshëm.
