Në kuadër të vizitës së punës në Vilnius të Lituanisë, ministri i Transformimit Digjital, Stefan Andonovski, realizoi takim bilateral me ministrin e Ekonomisë dhe Inovacioneve të Republikës së Lituanisë, Edvinas Grikshas.
Në takim u theksua se digjitalizimi paraqet një nga shtytësit kryesorë të rritjes ekonomike, rritjes së konkurrueshmërisë dhe modernizimit të sektorit publik. Në këtë kontekst, dy ministrat diskutuan për përvojën lituaneze në lidhjen e inovacioneve, ekosistemit të startup-eve, zgjidhjeve GovTech dhe politikave publike, si model i rëndësishëm për përshpejtimin e transformimit digjital.
“Transformimin digjital e shohim si bazë për rritje ekonomike, kompani më konkurruese dhe institucione më efikase. Përvoja lituaneze në lidhjen e inovacioneve, startup-eve, zgjidhjeve GovTech dhe politikave publike është veçanërisht e rëndësishme për Maqedoninë, sepse na hap hapësirë për bashkëpunim konkret, shkëmbim të njohurive dhe pilot-projekte që mund të japin rezultate të drejtpërdrejta për qytetarët dhe ekonominë”, theksoi ministri Andonovski.
Theks i veçantë iu kushtua rolit të Ministrisë së Ekonomisë dhe Inovacioneve të Republikës së Lituanisë në mbështetjen e ekonomisë digjitale, politikës së inovacionit dhe zhvillimit të kompanive teknologjike.
Ministri Andonovski theksoi se Maqedonia e sheh transformimin digjital si proces strategjik që duhet të sjellë shërbime publike më efikase, menaxhim më të mirë të të dhënave, interoperabilitet më të madh ndërmjet institucioneve dhe mbështetje më të fuqishme për inovacionet dhe teknologjitë e reja.
Në takim u shqyrtuan edhe mundësitë për bashkëpunim konkret bilateral në fushën e GovTech, zhvillimin e modeleve AI sandbox, si dhe përgatitjen e pilot-projekteve që mund të jenë të zbatueshme në Maqedoni. U propozua edhe shkëmbim teknik ndërmjet dy ministrive, me fokus në politikën e inovacionit, ekonominë digjitale dhe zgjidhjet praktike për digjitalizimin e sektorit publik. Dy shtetet tashmë bashkëpunojnë në pilotimin e zgjidhjeve për qytetarët përmes projektit GovTech4All dhe programit Evropa Digjitale.
Takimi paraqet hap të rëndësishëm në thellimin e bashkëpunimit ndërmjet dy vendeve në fushat e transformimit digjital, inovacioneve dhe zhvillimit ekonomik, si dhe në identifikimin e mundësive konkrete për ndihmë teknike, shkëmbim të ekspertizës dhe iniciativa të përbashkëta.
Në kuadër të vizitës, ministri Andonovski realizoi takim edhe me ministrin e Punëve të Jashtme të Republikës së Lituanisë, Kestutis Budris.
Në takim, ministri Andonovski theksoi rëndësinë që hapat reformues që po ndërmerr Maqedonia në agjendën digjitale, administratën publike dhe zhvillimin e shërbimeve digjitale të jenë të dukshme dhe të njohura në proceset rajonale dhe evropiane, përfshirë edhe në kontekstin e Planit të Rritjes, Agjendës Reformuese dhe eurointegrimeve.
