Ministria për Transformim Digjital dhe Këshilli Britanik sot nënshkruan një Memorandum bashkëpunimi, me të cilin vendoset një kornizë strategjike për riaktivizimin e projektit “Shkollat e Shekullit 21”. Kjo nënkupton aktivitete të përbashkëta të orientuara drejt avancimit të transformimit digjital, zhvillimit të aftësive digjitale dhe modernizimit të sistemit arsimor në Maqedoninë e Veriut.
Projekti përfshin përgatitjen e materialeve mësimore, punën e nxënësve me mikroprocesorë, projekte reale në shkolla, sigurinë kibernetike dhe bazat e inteligjencës artificiale.
Ky partneritet paraqet një hap të rëndësishëm drejt vazhdimit dhe zgjerimit të programit të suksesshëm “Shkollat e Shekullit 21”, i cili në periudhën e kaluar u mundësoi mijëra nxënësve dhe mësimdhënësve të zhvillojnë aftësi në kodim, mendim kritik dhe zgjidhje problemesh përmes përdorimit praktik të mjeteve digjitale, përfshirë edhe teknologjinë micro:bit.
Në kuadër të fazës së re të programit, parashihet forcimi shtesë i kapaciteteve të mësimdhënësve në fushat e të menduarit kritik, zgjidhjes së problemeve, kodimit, sigurisë kibernetike dhe bazave të inteligjencës artificiale, si dhe zgjerimi i mbështetjes për grupmoshat më të reja të nxënësve dhe nxitja e projekteve inovative shkollore.
Veçanërisht e rëndësishme është që kjo iniciativë do të realizohet në partneritet me Telekomin e Maqedonisë, si një mbështetës afatgjatë i arsimit digjital dhe inovacioneve teknologjike. Në fazën e ardhshme parashihet lidhja e një marrëveshjeje operative tripalëshe për implementimin e projektit “Shkollat e Shekullit 21” – Faza II, ndërmjet Ministrisë për Transformim Digjital, Këshillit Britanik dhe Telekomi i Maqedonisë.
Memorandumi u nënshkrua nga ministri për Transformim Digjital, Stefan Andonovski dhe Claire Sears, drejtoreshë për Ballkanin Perëndimor dhe bashkënënshkruese e Memorandumit. Në ngjarje morën pjesë edhe Matthew Lawson, ambasador i Mbretërisë së Bashkuar në Republikën e Maqedonisë së Veriut, Stela Durotovic, menaxhere për projekte arsimore për Ballkanin Perëndimor, si dhe Bela Trenevska Shotarovska, menaxhere për komunikime në Ambasadën Britanike.
