Централниот регистар на население претставува единствена, централизирана и електронска база на податоци која содржи точни, доверливи и редовно ажурирани информации за физичките лица во Република Северна Македонија. Овој регистар е воспоставен со цел да обезбеди сигурен и ефикасен систем за размена на податоци меѓу државните институции, како основа за дигитална трансформација и модернизација на јавните услуги.
Централниот регистар на население содржи т.н. референтни податоци за граѓаните, како што се: име и презиме, матичен број, датум и место на раѓање, државјанство, адреса на живеење, брачен статус и податоци за смрт. Овие податоци се унифицирани и достапни во реално време за овластени институции, со цел поедноставување на административните постапки и намалување на потребата граѓаните да поднесуваат различни документи.
Извори на податоци
Податоците во Централниот регистар на население се прибираат и ажурираат од следниве изворни институции:
- Министерство за внатрешни работи (МВР) – доставува податоци за лична идентификација, адреси и државјанство;
- Управа за водење на матичните книги (УВМК) – доставува податоци за раѓање, склучување или раскинување брак и смрт;
- Централен регистар на Република Северна Македонија (ЦРМ) – доставува податоци на граѓани поврзан со деловните субјекти, кога е релевантно.
Овие институции се единствени овластени извори на вистинити податоци во регистарот, и имаат обврска да ги ажурираат промените во согласност со закон.
Корисници на податоци
Овластен пристап до податоците на Централниот регистар на население за исполнување на нивните надлежности, имаат:
- Министерство за дигитална трансформација
- Министерство за финансии – Управа за финансиска полиција
- Министерство за образование и наука
- Царинска Управа на Република Северна Македонија
- Државен завод за статистика
- Централен регистар на Република Северна Македонија
- Агенција за вработување на Република Северна Македонија
- Агенција за катастар на недвижности
- Македонски Телеком АД – Скопје
- Евротруст Технолоџис ДООЕЛ
- Клириншка куќа Клириншки интербанкарски системи АД Скопје (КИБС АД Скопје)
- А1 Македонија ДООЕЛ – Скопје
Овие институции се корисници на податоци и пристапуваат до регистарот согласно своите законски надлежности, во строго контролирана и безбедна околина.
Централниот регистар на население овозможува:
- Намалување на административните трошоци и бирократија,
- Подобрување на точноста и доследноста на податоците,
- Поедноставување на процесите за добивање јавни услуги,
- Повисока доверба во институциите и нивните евиденции.
Сите активности поврзани со Централниот регистар на население се во согласност со Законот за централниот регистар на население и Законот за заштита на личните податоци.
- Закон за централен регистар на население Сл. весник на РСМ, број 98 од 2019 год.
- ЗИ на Закон за централен регистар на население, Сл.весник на РСМ, број 275 од 2019 год
- ЗИД на Закон за централен регистар на население, Сл.весник на РСМ, број 3 од 2025 год
- Закон за централен регистар на население - редакциски пречистен текст