ЗА НАС
Со измената на Законот за организација и работа на органите на државната управа (член 26-а), Министерството за дигитална трансформација е надлежно за безбедноста на мрежите и информациските системи на органите на државната управа.
Согласно член 12 од Законот за безбедност на мрежни и информациски системи („Службен весник на Република Северна Македонија“ бр. 135 од 4.7.2025), Министерството за дигитална трансформација ја врши функцијата Тим за одговор на компјутерски инциденти за органите на извршната власт (MKD-GOV-CSIRT).
МИСИЈА
Мисијата на MKD-GOV-CSIRT е да изгради и одржува сигурна, стабилна и отпорна сајбер средина во рамките на Владата и органите на државната управа, преку интегриран пристап кон управување со сајбер ризици и инциденти.MKD-GOV-CSIRT ја остварува својата мисија преку:
- превенција и управување со компјутерски безбедносни инциденти;
- координација и размена на информации за сајбер закани со националниот CSIRT и други релевантни институции;
- поддршка на конституентите при идентификација, анализа и решавање на сајбер инциденти;
- обезбедување на стратешки и оперативни насоки за имплементација на мерки за сајбер безбедност;
- промовирање на свеста за сајбер закани и употреба на безбедносни алатки и стандарди.
MKD-GOV-CSIRT постапува по пријавени или идентификувани сајбер безбедносни инциденти кои ги зафаќаат мрежите и информациските системи на Владата, министерствата, самостојните органи на државната управа, органите на државната управа во состав на министерствата, управните организации, општините и градот Скопје, со цел навремено откривање, анализа, координација и ублажување на последиците од компјутерски и мрежни инциденти.
Во рамките на својата надлежност, MKD-GOV-CSIRT:
· врши превенција, рана детекција, анализа и координиран одговор на сајбер безбедносни закани и инциденти кај субјектите од своја надлежност;
· изготвува планови, протоколи и технички насоки за управување со сајбер ризици, значајни инциденти и сајбер кризи;
· дава предупредувања, соопштенија, препораки и стручна поддршка до органите на извршната власт и другите субјекти утврдени со закон;
· води регистри и евиденции за инциденти, критични области и субјекти согласно законските одредби;
· соработува и врши размена на информации со Националниот центар за одговор на компјутерски инциденти (MKD-CIRT), надлежните државни органи, како и со домашни и меѓународни организации и мрежи;
· врши надзор над суштинските и важните субјекти во рамките на својата законска надлежност и предлага или изрекува мерки согласно закон;
· организира и спроведува обуки, вежби и активности за подигање на свеста и јакнење на капацитетите за сајбер безбедност;
· подготвува годишни извештаи и други стратешки и оперативни документи од областа на сајбер безбедноста;
· врши и други работи утврдени со закон
Конституенти на MKD-GOV-CSIRT се:
· Владата на Република Северна Македонија;
· министерствата;
· органите и организациите на државната управа;
· единиците на локалната самоуправа, вклучително општините во градот Скопје и градот Скопје.
MKD-GOV-CSIRT се состои од професионалци за сајбер безбедност вработени во Министерството за дигитална трансформација.За време на официјална комуникација поврзана со сајбер безбедносен инцидент, членовите на тимот се идентификуваат пред пријавителот со нивното целосно име и службена позиција.
КОНТАКТ:
За прашања или пријавување на безбедносен инцидент, ве молиме контактирајте нѐ на cyber.security@mdt.gov.mk.